Patr!k og Lauf­ey meðal hand­hafa Ís­lensku tón­listar­verð­launanna

Meðal þeirra sem komu fram á glæstri hátíð tónlistarfólks í kvöld eru Elín Hall, Hipsumhaps, Bára Gísladóttir, Spacestation og PATRi!K. Samtals voru 22 verðlaun veitt í kvöld.

Meðal þeirra eru Heiðursverðlaun Íslensku Tónlistarverðlaunanna og Bjartasta vonin í íslensku tónlistarlífi. Hörður Áskelsson hlaut heiðursverðlaunin í ár en Kári Egilsson var valin bjartasta vonin.

Ein verðlaunin verða þó ekki afhent í kvöld en það eru verðlaun fyrir plötuumslag ársins. Verðlaunin eru unnin í samstarfi við Félag íslenskra teiknara og verða afhent á FÍT verðlaununum þann 22. mars næstkomandi.

Akademía fjögurra dómnefnda Íslensku tónlistarverðlaunanna samanstendur af 24 einstaklingum sem eiga það sameiginlegt að hafa fjallað um tónlist, flutt hana eða samið á undanförnum árum. Í nefndunum sitja þrettán konur og þrettán karlar. Tveir formannanna eru karlar og tveir konur.

Listi yfir sigurvegara ársins:

PLÖTUR ÁRSINS

Sígild og samtímatónlist

• Atli Heimir Sveinsson: The Complete String Quartets - Siggi String Quartet

Djasstónlist

• Innermost - Mikael Máni Ásmundsson

Popp, rokk, hipphopp og raftónlist

• Museum - JFDR

Önnur tónlist

• BRIDGES II - Ægir

Kvikmynda- og leikhústónlist

• Knock At The Cabin - Herdís Stefánsdóttir

FLYTJENDUR ÁRSINS

Djasstónlist

• Andrés Þór Gunnlaugsson

Popp, rokk, hipphopp og raftónlist

• Laufey

Sígild og samtímatónlist

• Sæunn Þorsteinsdóttir

Önnur tónlist

• Mugison

SÖNGUR ÁRSINS

Djasstónlist

• Kristjana Stefánsdóttir

Popp, rokk, hipphopp og raftónlist

• Laufey

Sígild og samtímatónlist

• Jóhann Kristinsson

LÖG OG TÓNVERK ÁRSINS

Önnur tónlist

• Wandering Beings - Guðmundur Pétursson

Sígild og samtímatónlist

• COR - Bára Gísladóttir

Popp, rokk, hipphopp og raftónlist

• Skína - PATRi!K, Luigi

Djasstónlist

• Íslendingur í Uluwatuhofi - Stefán S. Stefánsson

- - -

Tónlistarviðburður ársins

• Sumarjazz á Jómfrúnni - Jómfrúin og Jakob Einar Jakobsson

Upptökustjórn ársins

• I Am Weary, Don't Let Me Rest - Snorri Hallgrímsson. Upptökustjórn: Bergur Þórisson, Cécile Lacharme, Hafsteinn Þráinsson, Martyn Heyne, Snorri Hallgrímsson, Styrmir Hauksson, Viktor Orri Árnason og Þorsteinn Eyfjörð

Texti ársins

• Hún ógnar mér - Vigdís Hafliðadóttir

Tónlistarmyndband ársins

• Waiting - Árný Margrét. Leikstjórn: Guðmundur Kristinn Jónsson

Bjartasta vonin

• Kári Egilsson

Tilnefningar fyrir plötuumslag ársins

• Átta - Sigur Rós: Hönnun: Ragnar Helgi Ólafssoon
• v2,2 - Róshildur: Hönnun: Þorgeir Kristinn Blöndal
• Museum - JFDR: Hönnun: Gréta Thorkelsdóttir og Dóra Dúna
• Gleypir tígur, gleypir ljón - Tumi Árnason og Magnús Trygvason Eliassen. Hönnun: Héðinn Finnsson (Íbbagoggur)
• How to Start a Garden - Nanna: Hönnun: Davíð Arnar Baldursson og Ragnar Þórhallsson
• Ást & praktík - Hipsumhaps, hönnun: Viktor Weisshappel Vilhjálmsson

Heiðursverðlaun Íslensku tónlistarverðlaunanna

Hörður Áskelsson er heiðursverðlaunahafi íslensku tónlistarverðlaunanna 2024.

Í tilkynningu kemur fram að Hörður hafi fæðst á Akureyri 22. nóvember 1953, sonur Áskels Jónssonar söngstjóra og organista frá Mýri í Bárðardal og Sigurbjargar Hlöðversdóttur, húsmóður, frá Djúpavogi. 

„Hörður hóf tónlistarnám sjö ára að aldri á Akureyri og varð stúdent frá M.A. 1973. Hann lauk Tónmenntakennaraprófi 1975 og burtfararprófi í orgelleik frá Tónlistarskólanum í Reykjavík. Hörður stundaði framhaldsnám við Robert Schumann tónlistarháskólann í Düsseldorf í Þýskalandi á árunum 1976 til 1981. Þaðan lauk hann A-prófi í kirkjutónlist með besta vitnisburði árið 1981.

Hörður var organisti Fríkirkjunnar í Hafnarfirði 1973 til 76 og organisti í Neanderkirche í Düsseldorf 1981 til 1982. Það ár kom hann heim og var ráðinn organisti og kantor Hallgrímskirkju. Því starfi gegndi hann frá 1982 til 2021. Á þessum tíma gegndi Hörður lykilhlutverki við uppbyggingu listalífs í Hallgrímskirkju. Hann stofnaði Mótettukór Hallgrímskirkju 1982 og stjórnaði honum frá upphafi. Hörður var stofnandi kammerkórsins Schola Cantorum frá 1996 og stjórnandi hans frá upphafi. Báðir þessir kórar hafa verið í fremstu röð íslenskra kóra um árabil.

Hörður hefur komið að frumflutningi fjölmargra tónverka sem hafa verið samin séstaklega fyrir hann og kóra hans, eftir íslensk samtímatónskáld. Þar að auki hefur hann flutt öll helstu kórverk sem um getur eftir helstu tónskáld heimsins. Hann hefur miðlað reynslu sinni við fjölbreytt kennslustörf, meðal annars sem kennari við ýmsa tónlistarskóla en einnig sem lektor í litúrgískum söngfræðum við guðfræðideild Háskóla Íslands. Hörður hefur ritað talsvert um tónlist auk þess að semja ógrynni af mótettum, sálmalögum og sönglögum um ævina.

Hörður hefur hlotið margskonar viðurkenningar fyrir stöf sín á sviði tónlistar, þar á meðal Íslensku tónlistarverðlaunin, Menningarverðlaun DV og Íslensku bjartsýnisverðlaunin. Hann var útnefndur Borgarlistamaður Reykjavíkur árið 2002 og hlaut riddarkross hinnar íslensku fálkaorðu árið 2004. Hörður hlaut Liljuna, viðurkenningu þjóðkirkjunnar, árið 2002, fyrir ævistarf sitt sem kantor Hallgrímskirkju í Reykjavík og hið mikla tónlistarlega frumkvöðlastarf sitt,“ segir í tilkynningunni.