Þyrla Landhelgisgæslunnar hefur verið kölluð út til aðstoðar við leitina að hinum tvítuga Helga Ingimar Þórðarsyni í Vestmannaeyjum sem hefur verið saknað síðan snemma í morgun.
Ásgeir Erlendsson upplýsingafulltrúi Landhelgisgæslunnar staðfestir þetta í samtali við fréttastofu.
„Leitin hefur ekki borið árangur. Við erum að leita með öllum tiltækum ráðum og mannskap,“ segir Stefán Jónsson yfirlögregluþjónn í samtali við fréttastofu.
Björgunarbátur hefur þegar verið ræstur út og leitar að Helga af sjó. Dalurinn og svæði í kringum Hamar vestanmegin á Heimaey hafa verið þaulkembd en ekkert sést til Helga.
Leit stendur yfir í Vestmannaeyjum að Helga Ingimar Þórðarsyni en hans hefur verið saknað síðan snemma í morgun. Björgunarbáturinn Þór hefur verið ræstur út til leitar á sjó.
Lögreglan í Vestmannaeyjum lýsir eftir Helga Ingimar Þórðarsyni. Helgi er 21 árs gamall, 192 cm á hæð og sást síðast klæddur í svartar buxur, svarta hettupeysu og dökkgrænan bomberjakka.
