En Samkaup er eitt þeirra fyrirtækja sem býður starfsfólki sínu upp á verkefnamiðað vinnufyrirkomulag.
„Það þýðir að þú vinnur eftir hentugleika á þeim staðsetningum sem henta hverju sinni.“
Í Atvinnulífinu í þessari viku fjöllum við um það fyrirkomulag vinnustaða að bjóða starfsfólki upp á að nýta sér skrifstofuhöbb í nærsamfélaginu sínu, til dæmis til að stytta ferðir til og frá vinnu, gera fólki kleift að eiga auðveldara með að sækja og skutla með börn í skóla eða frístundir og svo framvegis.
Færri skrifborð en starfsfólk
Hjá samstæðu Samkaup miðast vinnuaðstaðan við hvað hentar hverju verkefni og hverjum starfsmanni, á hverjum tíma fyrir sig.
„Við erum með verslanir út um allt land svo stundum eru verkefnin breytileg. Þetta snýst ekki lengur um viðveru á ákveðnum einum stað frá 8 til 16, heldur eru verkefnin fjölbreytt og unnin á mismunandi tíma, og hentar mismunandi fyrirkomulag hverjum starfsmanni og hverju sviði.“
Starfstöðvarnar eru víða:
„Við erum í dag með höfuðstöðvar í Krossmóum í Reykjanesbæ, þar sem eru færri borð en fjöldi starfsfólks er. Þá erum við einnig með aðstöðu við verslun okkar í Hafnarfirði með nokkrum borðum og einnig í Kjalarvogi inni hjá Samskipum,“ segir Gunnur og bætir við:
„Þess á milli nýtum við okkur ýmiskonar lausnir eftir landshlutum og hentugleika hvers starfs. Þá bjóðum við einnig upp á heimavinnu en við erum t.d. með einn starfsmann sem býr í Danmörku og er í fullri vinnu hjá okkur.“
Gunnur segir tæknina tryggja að fólk getur verið í stöðugu sambandi sín á milli.
„Þó við séum ekki endilega bundin við eina staðsetningu.“
Að bjóða upp á vinnuaðstöðu á ólíkum stöðum sé partur af því að auka á ánægju starfsfólks.
„Það að bjóða upp á sveigjanleika sem hentar starfsfólki og þeim verkefnum sem þau eru að sinna hverju sinni er því partur af því að mæta fólki þar sem það er, hverju sinni.“
Fjarvinna henti þó alls ekki öllum.
Fyrir suma hentar best að mæta á skrifstofu, fyrir aðra er gott að vera á ferðinni á milli starfstöðva og enn aðra að vera heima einn til tvo daga í viku.
Ef fólk er að vinna verkefnin sín og sinnir þeim vel, þá skiptir ekki máli hvar staðsetningin er.“
Góðu ráðin og gryfjurnar
Auðvitað er það þó svo að ekkert í lífinu er þannig að því fylgi ekki kostir og gallar.
Það sama á við um fjarvinnu annars vegar en að vinna saman staðbundið hins vegar.
„Það verður til dæmis ekki tekið af okkur, að þegar fólk kemur saman í hugmyndavinnu, þá gerast töfrar þegar við erum auglitis til auglitis,“ segir Gunnur og bætir við:
„Það er gaman að vera með hópi fólks í vinnu en þess á milli þarf að vera einbeitingarvinna og það getur verið misjafnt hvar og hvernig aðstæður henta okkur best í þesskonar vinnu, svo mismunandi aðstæður og vinnuumhverfi þarf að styðja við þá vegferð að styðja við fólk og horfa fremur á verkefni fólks heldur en innstimplun og útstimplun.“
Hugmyndafræðin er auðvitað sú að hver og einn skili sínu vel, vinni með sínu teymi og séu sátt.
„Allt annað er svo samtal sem þarf að taka við starfsmanninn sjálfan og aðlaga eftir því viðfangsefni sem kemur upp.“
Til framtíðar sér Gunnur fyrir sér að vinnufyrirkomulagið verði alls konar og kannski allt í bland.
„Ég persónulega er á því að mikilvægt er að hitta fólk til að mynda góð tengsl og við þurfum öll að samstilla okkur með því að tala saman og hef ég mikla trú á orku þess að hittast auglitis til auglitis. Það er þó ekki endilega bundið við staðsetningu heldur getur það líka verið í óformlegri aðstæðum og hef ég oft á tíðum boðið fólki bara í góðan kaffibolla á Te og kaffi inn á milli, eða jafnvel í göngutúr með hundana mína.“
Að hennar mati þurfi stjórnendur fyrst og fremst að gera sér grein fyrir því að fólk er misjafnt og að það sé á ábyrgð stjórnenda að læra inn á fólkið og mæta því eins og hægt er í vinnu-umhverfinu.
Stærsti lærdómurinn myndi ég telja að það er engin ein leið sem hentar öllum, svo það er verkefni okkar að finna hvaða sveigjanleiki hentar og hvernig virkjum við fólk með því að bjóða upp á góðan sveigjanleika og vinna samt vel í teymi.“
