Frægasta dúkka í heimi mótaði Erlu mest

Fegurðarsamkeppnin Ungfrú Ísland verður haldin í tíunda skipti þann 3. apríl næstkomandi og fer fram í Gamla bíói. Keppendur eru tuttugu talsins og eru á aldrinum 18 til 37 ára.

Lífið á Vísi ræðir við stúlkurnar sem keppast um titilinn Ungfrú Ísland í ár og fær að kynnast þeim aðeins betur. Ungfrú Ísland verður í beinni útsendingu þann 3. apríl á Vísi og Stöð 2 Vísi.

Fullt nafn? Erla Talía Einarsdóttir.

Aldur? 18 ára.

Hvernig myndir þú lýsa sjálfri þér í þremur orðum? 

Skemmtileg, ljúf, kraftmikil.

Hvað kæmi fólki mest á óvart að vita um þig? Ég hef verið með rautt, svart, bleikt og brúnt hár.

Hver er fyrirmynd þín í lífinu? Jennifer Lawrence.

Hvað hefur mótað þig mest? 

Barbie.

Hver er mesta áskorunin sem þú hefur þurft að takast á við, og hvernig komstu þér í gegnum hana? Það var keyrt á mig á 70 kílómetra hraða og ég flaug í þrjá hringi. Ég þurfti að vera rúmliggjandi í einn mánuð. Mamma mín kom mér í gegnum þann tíma með daglegum trúðadönsum fyrir framan rúmið mitt ásamt því að horfa Love island.

Hverju ertu stoltust af? Ég er stoltust af mömmu minni fyrir að vera svona sterk kona bæði andlega og líkamlega.

Hver er þín mesta gæfa í lífinu? Súkkulaði, sólin og ást.

Hvernig tekstu á við stress og álag? Anda í kassa: „Anda inn í fjórar sekúndur, halda inni í fjórar sekúndur, anda út í fjórar sekúndur, halda úti í fjórar sekúndur“.

Besta heilræði sem þú hefur fengið? Það var einu sinni sagt við mig: „Þú lifir bara einu sinni, hafðu gaman af lífinu.“

Neyðarlegasta atvik sem þú hefur lent í? Ég var einu sinni í sundi og ég stakk mér út í djúpu laugina og sundbuxurnar mínar runnu af.

Býrðu yfir einhverjum leyndum hæfileika? Ég get hreyft augun mín í sitthvoru lagi.

Hvað finnst þér heillandi í fari fólks? 

Sjálfstraust og einlægni.

En óheillandi? Táfýla og óheiðarleiki.

Hver er þinn helsti ótti? Minn helsti ótti er lofthræðsla og Alzheimer-sjúkdómurinn.

Hvar sérðu þig eftir tíu ár? Ég sé mig sem flugfreyju og sjálboðarliða fyrir einhvers konar dýra samtök, mögulega vera orðin móðir en aðallega hamingjusöm.

Hvaða tungumál talarðu? Íslensku og ensku.

Hvað er uppáhalds maturinn þinn? Uppáhalds maturinn minn er Dadsanja, Lasagna sem frændi minn Davíð Sigurgeirsson gerir.

Hvaða lag tekur þú í karókí? Ég elska Bohemian Rhapsody, en get ekki lofað því að ég sé góð.

Hver er frægasti einstaklingur sem þú hefur hitt? Ég er í frekar stórri tónlistarfjölskyldu þannig ég er ekki viss.

Hvort kýstu að skrifa skilaboð eða eiga samskipti við fólk í eigin persónu? Ég myndi allan daginn frekar vilja að eiga samskipti við fólk í persónu.

Ef þú fengir tíu milljónir til umráða, hvað myndirðu gera við peningana? Ég myndi vilja styrkja Barnaspítalann og heilbrigðiskerfið. Barnaspítalinn var mjög jákvæð upplifun fyrir mig þrátt fyrir að ég var slösuð þar sem ég fékk endalaust af ís og yndislegt starfsfólk sýndi mér mikla hlýju.

Hvað var það sem vakti áhuga þinn á keppninni? Hún yndislega amma mín hefur allt mitt líf hvatt mig áfram að fara í keppnina. Ég tók ákvörðunina að sækja um þegar ég sá á TikTok hvað ferlið væri upp byggjandi.

Hvað ert þú búin að læra í ferlinu? Ég er búin að læra hvað hópefli skiptir miklu máli í líf allra. Og ég hefði aldrei trúað því að væri svona skemmtilegt og eða frelsandi að fara í hæla og bikiní tvisvar í viku og læra að dansa, labba, hlaupa, snúningar og fleira fyrir framan hóp af stelpum. Mér þykir svo vænt um þennan hóp og ég hlakka til að fara með þeim á stóra sviðið. 

Mér finnst ég meira og meira læra að elska sjálfa mig eins og ég er.

Hvaða samfélagslega málefni brennur þú fyrir? Heilbrigðiskerfið á Íslandi.

Hvaða kosti þarf Ungfrú Ísland að búa yfir? Til að verða Ungfrú Ísland þarf maður að vera sjálfsöruggur, jákvæður og góð fyrirmynd. Það skiptir ekki bara máli að vera fallegur að utan heldur líka að hafa hlýtt hjarta og bera virðingu fyrir öðrum. Umburðarlyndi, metnaður og góð orka gera manneskjuna að sanni fallega!

Af hverju sækist þú eftir því að vera næsta Ungfrú Ísland? Að taka þátt í Ungfrú Ísland hefur alltaf verið stór draumur hjá mér, og amma mín hefur alltaf hvatt mig áfram. Ég elska að kynnast nýju fólki, vaxa sem manneskja og nýta þetta tækifæri til að hafa jákvæð áhrif.

Hvað greinir þig frá öðrum keppendum? Ég er opin, jákvæð og forvitin um heiminn. Ég tek þátt í þessari keppni með metnað, hjartahlýju og mikla löngun til að vaxa og læra. Ég elska að kynnast nýju fólki og finn alltaf leið til að hafa gaman, sama hvað ég er að gera!

Hvert er stærsta vandamálið sem þín kynslóð stendur frammi fyrir? Og hvernig mætti leysa það? Ég tel að stærsta vandamálið okkar kynslóðar sé óraunhæfur þrýstingur frá samfélagsmiðlum. Við erum stöðugt að bera saman okkur við fullkomnar myndir sem valda kvíða, “FOMO”, þunglyndi og þeim erfiðleikum að tengjast raunveruleikanum og náttúrunni. Auk þess gerir hækkandi húsnæðiskostnaður og önnur fjárhagsleg vandamál daglegt líf erfitt. 

Til að leysa þetta þurfum við að styrkja sjálfsmynd okkar, tala opinskátt um tilfinningar og stuðla að raunverulegum tengslum, bæði við fólk og náttúru.

Hvað viltu segja við þá sem hafa neikvæða skoðun á fegurðarsamkeppnum? Mér finnst gamla góða línan lýsa þessu dæmi mjög vel “don’t judge a book by its cover”. Þetta snýst um miklu meira en bara fegurð, þetta snýst um innri persónu og styrkleika, og hvað þú hefur fram að færa. Ferlið er mjög styrkjandi fyrir líkama og sál.