Albert Guðmundsson og félagar í Fiorentina eru komnir áfram í átta liða úrslit Sambandsdeildarinnar eftir 3-1 sigur í seinni leiknum á móti Panathinaikos.
Sverrir Ingi Ingason og félagar í Panathinaikos unnu fyrri leikinn 3-2 en Ítalirnir voru búnir að snúa því við eftir 24 mínútur. Fiorentina vann að lokum samanlagt 5-4.
Rolando Mandragora kom Fiorentina í 1-0 á 12. mínútu og Alber Guðmundsson skoraði síðan annað markið á 24. mínútu eftir sendingu frá Luca Ranieri.
Albert skoraði með vinstri fótar skoti utarlega úr teignum úr erfiðri stöðu en það voru bara 0,02 xG líkur í þessu færi hans.
Þetta var sjöunda mark Alberts fyrir Fiorentina á leiktíðinni þar af annað markið hans í Sambandsdeildinni.
Moise Kean skoraði síðan þriðja mark Fiorentina á 75. mínútu en þetta var ekki búið.
Fotis Ioannidis minnkaði munninn í 3-1 með marki úr vítaspyrnu á 81. mínútu og því þurftu Grikkirnir bar eitt mark í viðbót.
Það kom hins vegar ekki og Albert fagnaði sigri í Íslendingaslagnum og sæti í átta liða úrslitunum.
Chelsea vann 1-0 sigur á danska liðinu FC Kaupmannahöfn á Stamford Bridge í sömu keppni og þar með 3-1 samanlagt. Kiernan Dewsbury-Hall skoraði sigurmarkið í kvöld en hann skoraði þá á 55. mínútu.
Manchester United lánsmaðurinn Antony skoraði eitt mark og Cédric Bakambu var með tvö mörk þegar Real Betis vann 4-0 útisigur á Vitoria de Guimaraes en spænska liðið vann samanlagt 6-2. Antony lagði líka upp mark fyrir Isco.
