Þýska liðið Dortmund á nú tvo markahæstu táningana í fimm stærstu deildum Evrópu og það þótt annar þeirra sé nýbyrjaður að spila með liðinu.
Erling Braut Håland var enn á ný á skotskónum um helgina þegar hann var í fyrsta sinn í byrjunarliði Borussia Dortmund.
Borussia Dortmund keypti norska framherjann frá Red Bull Salzburg í janúar og hann hafði skorað fimm mörk sem varamaður í fyrstu tveimur leikjum sínum.
Håland byrjaði inn á í leiknum á móti Union Berlin og skoraði tvö mörk og fiskaði að auki eina vítaspyrnu.
Þessi sjö mörk hafa skilað Erling Braut Håland upp í annað sætið yfir markahæstu táninganna í toppdeildum Evrópu eins og sjá má hér fyrir neðan. Hann hefur aðeins þurft 136 mínútur til að skora þessi mörk og er að því að skora á nítján mínútna fresti.
Europe's next gen already making waves pic.twitter.com/gjGQEgGYWR
— B/R Football (@brfootball) February 3, 2020
Jadon Sancho, liðsfélagi Håland hjá Dortmund, er áfram markahæsti táningurinn en Sancho skoraði einnig fyrir Borussia Dortmund um helgina. Sancho er með 12 mörk og 13 stoðsendingar í 18 deildarleikjum með Borussia Dortmund á tímabilinu.
Hinn sautján ára gamli Ansu Fati komst líka inn á listann um helgina þegar hann skoraði bæði mörk Barcelona í 2-0 sigri á Levante.
Fati varð um leið yngsti leikmaður spænsku deildarinnar frá upphafi til að skora tvívegis í leik en bæði mörkin hans komu eftir stoðsendingar frá Lionel Messi.
