Viðskipti erlent

MGM og James Bond til sölu

Samúel Karl Ólason skrifar
Eigendur MGM vonast til þess að komandi útgáfa No Time to Die í apríl muni kveikja áhuga fjárfesta.
Eigendur MGM vonast til þess að komandi útgáfa No Time to Die í apríl muni kveikja áhuga fjárfesta. EPA/JOERG CARSTENSEN

Forsvarsmenn MGM Holdings Inc. eru sagðir leita leiða til að selja kvikmyndaver félagsins og með því njósnarann fræga, James Bond. Telja þeir að kvikmyndasafn versins muni vekja athygli streymisveita. Þetta er ekki í fyrsta sinn sem kvikmyndaverið er til sölu á undanförnum árum en hingað til hafa fjárfestar ekki bitið á agnið vegna verðsins, sem þeir telja of hátt.

Samkvæmt frétt Wall Street Journal er markaðsvirði kvikmyndaversins um 5,5 milljarðar dala, eða um 700 milljarðar króna. Nú vonast forsvarsmenn félagsins til þess ástandið sé betra þar sem streymisveitur keppi um efni til að bjóða notendum sínum upp á.

Kvikmyndirnar um James Bond eru líklegast stærsta eign MGM, sem félagið á með Danjaq LLC, en safn MGM inniheldur alls rúmlega fjögur þúsund titla og sautján þúsund klukkustundir af sjónvarpsefni, samkvæmt frétt Variety. Þar á meðal eru kvikmyndir eins og Rocky, Hobbit, Terminator og Silence of the lambs.

Safnið inniheldur einnig þætti eins og Handmaids Tale og Vikings.

Fjárfestar keyptu skuldir MGM árið 2010 þegar útlit var fyrir að félagið yrði gjaldþrota. Í frétt WSJ segir að þeir hafi veðjað á að streymisveitur myndu kaupa félagið á endanum, vegna umfangsmikils safns þess. Fáir þeirra sem komu félaginu til bjargar bjuggust við því að eiga það enn tíu árum seinna.

Nú halda þeir í þá von að útgáfa No Time to Die, nýjustu myndarinnar um Bond sem gefa á út í apríl, muni endurvekja áhuga fjárfesta.

Bíó og sjónvarp James Bond Bandaríkin


Mest lesið


Fleiri fréttir

Sjá meira


×

Mest lesið