Yfirtakan muni líklega róa markaði í Evrópu

Viðræður um yfirtöku svissneska bankans UBS á Credit Suisse hófust á föstudagskvöld en seðlabankinn og fjármálaeftirlitið þar í landi stóðu að viðræðunum, sem höfðu það markmið að endurvekja traust á bankakerfinu. Þá var greint frá því að ríkisstjórn Sviss hafi hist á neyðarfundi og að yfirvöld hygðust breyta lögum til að flýta fyrir samrunanum.

Financial Times greindi fyrst frá fréttunum og í morgun var greint frá því að UBS hafi lagt fram tilboð sem hljóðaði upp á 0,25 svissneska franka á hlut eða allt að 900 milljónir í heildina. Við lokun markaða á föstudag var lokaverð hluta í Credit Suisse 1,86 svissneskir frankar og markaðsvirði bankans 7,43 milljarðar. Mikil óánægja hafi verið úr búðum Credit Suisse með það tilboð.

Síðdegis í dag var þá greint frá því að samkomulag hafi náðst og var kaupverðið þá rúmlega tveir milljarðir Bandaríkjadala. Forseti Sviss staðfesti kaupinn á blaðamannafundi á sjöunda tímanum í kvöld.

Muni væntanlega róa markaði í Evrópu

Rætt var við Snorra Jakobsson, greinanda hjá Jakobsson Capital, í kvöldfréttum Stöðvar 2 í dag áður en kaup UBS voru staðfest en þá lá fyrir fyrsta boðið frá bankanum. Hann segir fall Credit Suisse ekki hafa komið sérstaklega á óvart.

„Þetta er í raun og veru bara fimmtán ára gamalt vandamál. Bankar í Evrópu gengu aldrei í gegnum svona þessu sömu endurskipulagningu eins og íslensku bankarnir, sérstaklega þarna í Sviss, það breytist aldrei neitt þar. Það var mikið af vandamálum og slæmur rekstur sem að var hreinlega ekki búið að taka á“ segir Snorri.

Það komi ekki á óvart að boðið hafi verið langt undir markaðsvirði.

„Þegar það er svona mikill skortur á fjármagni þá sjá menn sér gott til glóðarinnar, þetta er svona brunasala. Það er úlfatími núna á fjármálamarkaði og þegar það vantar fjármagn, eins og hjá þessum banka, þá seljast eignirnar ekki á háu verði,“ segir Snorri.

Mikill titringur var á fjármálamörkuðum víða um heim í síðustu viku. Vendingar erlendis bitna líklega lítið á Íslandi, þar sem bankarnir hafa verið styrktir verulega eftir hrun.

„Hérna heima hefur þetta sáralítil áhrif en þetta róar væntanlega markaði í Evrópu og á flestum stöðum eru bankar miklu betur reknir en Credit Suisse, hann var svona svarti sauðurinn,“ segir Snorri. 

Vankantar á kerfinu í Bandaríkjunum kristallast

Þó Credit Suisse hafi verið stærsti bankinn til að falla gerðu vandamálin fyrst vart við sig í Bandaríkjunum, fyrst með falli Silicon Valley Bank á mánudag og síðar Signature bankans. Að sögn Snorra hefur lítið breyst þar.

„Það er náttúrulega búið að taka yfir þarna einhverja banka og leysa úr bönkunum. Á bandarískum mælikvarða eru þetta mjög litlir bankar en það sem hefur kannski verið að kristallast og koma þarna í ljós er að litlir bankar í Bandaríkjunum hafa ekki verið undir jafn ströngu eftirliti og stærri bankarnir,“ segir Snorri.

Þá bendir hann á að bankar sem teljast litlir í Bandaríkjunum séu um 25 sinnum stærri en íslensku bankarnir. Þeir séu þó undir mjög veiku fjármálaeftirliti, sem sýni fram á ákveðið kæruleysi. 

Hvort breytingar á regluverkinu, líkt og Bandaríkjaþing hefur rætt, sé lausnin segir Snorri erfitt að segja.

„En það er alveg ljóst að mörkin voru allt of hátt uppi og þeir þurfa að endurskoða eitthvað löggjöfina og herða hana fyrir þessar minni fjármálastofnanir,“ segir hann.