Gengu langt í að vinna að lausn þótt bíllinn væri ekki í á­byrgð

„Bílar eru flóknir og geta alltaf bilað. Í þessu tilviki var bíllinn ekki lengur í ábyrgð en eins og hann rekur í sínu máli þá náðist sú lending að viðskiptavinurinn þurfti einungis að greiða brot af viðgerðarkostnaði. Þetta endaði raunar með því að hann greiddi ekkert,“ segir Jón Trausti.

Daníel Andri Fredriksen sagði í færslu á Facebook í gær farir sínar ekki sléttar af samskiptum og viðskiptum  við Öskju vegna bilunar sem upp kom í Honda-bíl hans frá 2018. Daníel hefur síðan fjarlægt færsluna og segist í samtali við fréttastofu ekki hafa neitt upp á fyrirtækið að klaga. 

Hann fór í færslunni stórum orðum um fyrirtækið og gagnrýndi þar meðal annars að Askja ábyrgðist ekki bílinn vegna vélarbilunar sem kom upp. Hann hefði þurft að greiða 400 þúsund krónur vegna viðgerðar sem metin var á fjórar milljónir, kostnað sem hann sagðist þó allt annað en ánægður með að hafa þurft að standa straum af.

Jón Trausti segir fullyrðingar Daníels ekki eiga við rök að styðjast og niðurstöðuna hafa verið þá að viðskiptavinurinn greiddi ekkert. 

Áfram verksmiðjuábyrgð

Jón Trausti segir að í máli þessa tiltekna manns þá hafi bíllinn verið seldur 2018 af Bernhard, sem sé annað fyrirtæki.

„Við keyptum ekki fyrirtækið heldur tókum við Honda-umboðinu og þeim skyldum sem voru til staðar gagnvart viðskiptavinum. Í þessu tilviki þá var umræddur bíll keyptur 2018 og þá með þriggja ára verksmiðjuábyrgð. Sú ábyrgð var áfram í gildi. Eftir að við tökum við umboðinu þá lengjum við ábyrgðina á þeim bílum sem við seljum úr þremur í fimm ár. Verksmiðjuábyrgðin var hins vegar þrjú ár og bílar sem Bernhard seldi héldu að sjálfsögðu þeirri ábyrgð á meðan hún var í gildi þó að það væri kominn nýr umboðsaðili. 

Bílar eru hins vegar flóknir og geta alltaf bilað. Framleiðendur taka á því eftir því sem við á með innköllunum. Það á þó ekki við í þessu tilviki. En bíllinn var því ekki lengur í ábyrgð en unnum samt að því að finna lausn með viðkomandi.“

Leggja sig fram

Jón Trausti segir að Askja leggi sig ávallt fram um að leiðbeina og aðstoða viðskiptavini eins langt og hægt er.

„Eftir að við tókum við Honda-umboðinu árið 2019 þá lengdum við ábyrgðina á Honda-bílum úr þremur í fimm ár sem er til hagsbóta fyrir neytendur. Við höfum raunar verið þekkt fyrir mjög langa og góða ábyrgð. Við erum mjög stolt af okkar þjónustu og leggjum okkur ávallt fram við að leysa málin með okkar viðskiptavinum. Ef mál fara svo fyrir einhverja aðila, eins og FÍB eða Bílgreinasambandið, þá erum við alltaf skuldbundin til að lúta þeirra niðurstöðu og gerum það alltaf.“

Jón Trausti segir ennfremur að Askja muni hér eftir til áður reyna að leysa úr máli þessa tiltekna viðskiptavinar eins og við framast sé hægt. 

„Eins og fram kemur í hans máli þá höfum við lagt okkur gríðarlega fram í því og munum áfram vinna í málinu.“

Athugasemd ritstjórnar

Fréttin að ofan eru viðbrögð framkvæmdastjóra Öskju við frétt á Vísi af ósáttum viðskiptavini fyrirtækisins Daníel Andra Fredriksen sem vakti fyrst athygli á málinu með færslu á Facebook. Daníel hefur nú fjarlægt færsluna og segist ekki standa við stóru orðin sem hann viðhafði um bílaumboðið. Aðspurður hvað hefði breyst sagði hann Öskju hafa leyst málið. Hans pirringur hefði aðallega snúið að því að fá ekki bílaleigubíl á meðan umboðið vann að máli hans. Fyrri fréttin sem birtist á Vísi seint í gærkvöldi með yfirlýsingum Daníels hefur verið fjarlægð vegna þess að hann hefur dregið til baka þau stóru orð sem hann hafði um fyrirtækið. Hann segist í morgunsárið mjög sáttur við viðbrögð Öskju. Vísir biðst afsökunar á að hafa birt fréttina áður Öskju gafst færi á að koma sjónarmiðum sínum á framfæri.