Rossi á verðlaunapall í 200. sinn

Spánverjinn Jorge Lorenzo vann öruggan sigur í Spánarkappakstri MotoGP mótaraðarinnar. Valentino Rossi endaði í þriðja sæti og er fyrsti maðurinn til að ná 200 sinnum á verðlaunapall.

Lorenzo var fremstur á ráspól, leiddi allan tímann og kom í mark rúmum 5 sekúndum á undan næsta manni, tvöföldum heimsmeistara Marc Marquez. Óvíst var með þátttöku Marquez fyrir kappaksturinn þar sem hann braut fingur á æfingu í síðustu viku.

Valentino Rossi, sem unnið hefur heimsmeistaratitilinn sjö sinnum á ferlinum, skráði nafn sitt í sögubækurnar. Hann endaði í þriðja sæti en þetta var í 200. sinn sem hann nær á verðlaunapall.

Rossi er efstur í stigakeppninni, 15 stigum á undan Andrea Dovizioso.