Rashford lauk ævin­týri Stefáns Teits og fé­laga

Stefán Teitur Þórðarson og félagar hans í Preston, eina B-deildarliðinu sem enn var með í keppninni, máttu sín lítils gegn Aston Villa og töpuðu 3-0 á heimavelli í 8-liða úrslitum ensku bikarkeppninnar í fótbolta.

Þar með lauk bikarævintýri Preston en Villa-menn eru komnir í undanúrslitin líkt og Nottingham Forest og Crystal Palace. Það verður svo Manchester City eða Bournemouth sem tekur síðasta sætið í undanúrslitunum en liðin mætast í dag.

Það var Marcus Rashford sem gerði gæfumuninn á Deepdale í dag en hann skoraði fyrstu tvö mörk sín eftir komuna til Villa frá Manchester United.

Stefán Teitur hafði reyndar verið nálægt því að koma Preston yfir, með skalla í fyrri hálfleik, en staðan var markalaus í hálfleik. Á 58. mínútu skoraði Rashford eftir snarpa skyndisókn og sendingu frá Lucas Digne. Rashford bætti svo við öðru marki fimm mínútum síðar úr öruggri vítaspyrnu. Á 71. mínútu skoraði Jacob Ramsey þriðja markið.